Благословен Бог наш… Лик: Царю Небесный. Трисвятое по Отче наш: Приидите, поклони́мся… (трижды)
Псалом 141:
Гласом моим ко Господу воззвах, гласом моим ко Господу помолихся.
Пролию пред Ним моление мое, печаль мою пред Ним возвещу, Внегда исчезати от Мене духу моему: и Ты познал еси стези моя: на пути сем, по немуже хождах, скрыша сеть мне. Смотрях одесную и возглядах, и не бе знаяй мене: погибе бегство от Мене, и несть взыскаяй душу мою. Воззвах к Тебе, Господи, рех: Ты еси упование мое, часть моя еси на земли живых. Вонми молению моему, яко смирихся зело: избави мя от гонящих мя, яко укрепишася паче мене. Изведи из темницы душу мою, исповедатися имени Твоему. Мене ждут праведницы, дóндеже воздаси мне.
Слава, и ныне. Аллилуия (трижды).
Мирная ектения
Миром Господу помолимся!
Лик: Господи, помилуй.
О свышнем мире, и спасении душ наших, Господу помолимся.
О мире всего мира, благостоянии святых Божиих церквей, и соединении всех, Господу помолимся.
О святем храме сeм, и с верою, благоговением и страхом Божиим входящих вонь, Господу помолимся.
О православном епископстве о честнем пресвитерстве, во Христе диaконстве, о всeм причте и людех, Господу помолимся.
О страждущей стране нашей и православных людех ея, во oтeчестве и разсеянии сущих и о спасении их, Господу помолимся.
О еже избавити люди своя от нашествия безбожных и еретиков, и всех брани хотящих человек, победу нам на супостаты даруя, в нас же утвердити единомыслие, братолюбие и благочeстие, Господу помолимся.
О еже низвергнути богомерзкое еретическое царство и власть, на ны движимыя, и очистити землю людей Своих от нечестия их, и православным предати, Господу помолимся.
О еже призрети вскоре на молитву смиренных, и не уничижити моления их, и услышати воздыхание окованных, в плену сущих верных рабов Своих (раба Своего, рабу Свою, имярек), и в них прославити имя Свое, Господу помолимся.
О еже не оставити до конца, верных рабов Своих (раба Своего, рабу Свою, имярек) от безбожных еретиков мучитися, но скоро свободити их, Господу помолимся.
О еже вскоре услышати глас моления нашего и от уз и темницы милостивно свободити рабов Своих (раба Своего, рабу Свою, имярек), Господу помолимся.
О еже не предати нас в попрание и разорение врагом и супостатом нашим, но в бегство все дерзновение их претворити, и мышцу их сокрушити, и под ноги верных Своих покорити, Господу помолимся.
О еже пременити всю скорбь и сетование наше на радость и веселие, войну же в твердый мир обратити, и Церковь нашу непребориму от всех вражиих наветов всегда сотворити, Господу помолимся.
О еже умирити Церковь Свою святую, и невредиму и непоколебиму ю соблюсти от всякаго злаго обстояния всех сопротивных апостат, Господу помолимся.
О избaвитися нам от всякия скорби, гнева и нyжды, Господу помолимся.
Заступи, спаси, помилуй, и сохрани нас Боже, Твоею благодaтию.
Пресвятую, Пречистую, Преблагословeнную, славную Владычицу нашу Богородицу и Приснодеву Марию, со всеми святыми помянyвше, сами себе, и друг друга, и весь живот наш Христу Богу предадим.
Возглас: Яко Ты еси крепость и утверждение людем Своим, и Тебе подобает всякая слава честь и поклонение, Отцу и Сыну и Святому Духу, ныне и присно, и во веки веков.
Аминь.
«Бог Господь», глас 1-й.
Бог Господь и явися нам, благословен Грядый во имя Господне.
Стих 1: Исповедайтеся Господеви, яко благ, яко в век милость Его.
Стих 2: Обышедше обыдоша мя и именем Господним противляхся им.
Стих 3: Не умру, но жив буду и повем дела Господня.
Стих 4: Камень, егоже небрегоша зиждущии, сей бысть во главу у́гла, от Господа бысть сей и есть дивен во очесех наших.
Тропарь, глас 2-й:
Манасси́ю от уз и го́рькаго заточе́ния,/ моли́тв ра́ди свободи́вый, Всеще́дрый Бо́же,/ и рабы́ Твоя́ (и раба́ Твоего́ имярек) на́ми ны́не моля́щияся,/ от уз и заточе́ния свободи́,/ и от вся́каго зла́го обстоя́ния изба́ви,// я́ко Еди́н Человеколю́бец.
Слава, и ныне.
Кондак, глас 5:
Я́ко милосе́рдия Исто́чник,/ и бла́гости Пучи́на, Христе́ Бо́же,/ не пре́зри в ско́рбех и беда́х Тебе́ ве́рою призыва́ющих,/ но я́ко Щедр, поми́луй,/ и от уз ско́ро свободи́,// да пое́м Ти:
Аллилу́ия.
Премудрость, прокимен, глас 7:
Изведи из темницы душу мою, исповедатися имени Твоему.
Стих: Вонми молитве моей, яко смирихся зело.
Деяний Святых Апостол чтение. Вонмем.
Деяния Апостолов, зач. 29 (12.1-11).
Во дни оны, возложи Ирод царь руце озлобити некия иже от Церкве. Уби же Иакова брата Иоаннова мечем. И видев, яко годе есть иудеем, приложи яти и Петра: бяху же дние опресночнии. Егоже и ем всади в темницу, предав четырем четверицам воинов стрещи его, хотя по Пасце извести его к людем. И убо Петра стрежаху в темнице: молитва же бе прилежна бываемая от Церкви к Богу о нем. Егда же хотяше его извести Ирод, в нощи той бе Пeтp спя между двема воинома, связан железнома ужема двема, стражие же пред дверьми стрежаху темницы. И се Ангел Господень предста, и свет возсия в храмине: толкнув же в ребра Петра, воздвиже его глаголя: востани вскоре. И спадоша ему ужа железная с руку. Рече же Ангел к нему: препояшися, и вступи в плесницы твоя: сотвори же тако. И глагола ему: облецыся в ризу твою, и последствуй ми. И изшед в след его идяше: и не ведаше, яко истина есть бывшее от Ангела, мняше же видение зрети. Прошедша же первую стражу и вторую, приидоста ко вратом железным, вводящим во град, яже о себе отверзошася има: И изшедше преидоша стогну едину, и абие отступи Ангел от него. И Петр быв в себе, рече: ныне вем воистину, яко посла Бог Ангела Своего, и изъят мя из руки Иродовы, и от всего чаяния людей Иудейских.
Премудрость, прости, услышим Святаго Евангелия.
Мир всем. От Иоанна Святаго Евангелия чтение.
Вонмем.
Евангелие от Иоанна, зач. 31 (8.31-36).
Рече Господь к веровавшым Ему Иудеом: аще вы пребудете во словеси Моем, воистинну ученицы Мои будете и уразумеете истину, и истина свободит вы. Отвещаша и реша Ему: семя Авраамле есмы и ни комуже работахом николиже, како Ты глаголеши, яко свободни будете? Отвеща им Иисус: аминь, аминь глаголю вам, яко всяк творяй грех раб есть греха, раб же не пребывает в дому во век, сын пребывает во век. Аще убо Сын вы свободит, воистинну свободни будете.
Слава Тебе, Господи, слава Тебе.
Сугубая ектения:
Помилуй нас, Боже по велицей милости Твоей, молимтися, услыши и помилуй.
Лик: Господи, помилуй (трижды).
Милостивным Твоим оком, благоутробно призри человеколюбче Господи, на воздыхания, слезы и стенания православных рабов Твоих (имярек), под игом лютым заключенных, якоже призрел еси иногда на Израиля во Египте сущаго, и скоро свободи их: сердцем сокрушенном прилежно молимтися, услыши и помилуй.
Умилосердися Господи Боже отец наших на верныя, аще и согрешившия люди Твоя, ихже праведным Твоим судом предал еси в руки врагов беззаконных мерзких отступников, и правителю нечестиво неправедному и лукавнейшому паче всея земли, и не предаждь их до конца имени Твоего ради, и не разори завета Твоего, и не отстави милости Твоея от них: но изми их от лютаго мучительства, разори безбожное еретическое царство, и православных христиан свободи. Милосердному Богу нашему молимся,
скоро услыши, и милостивно помилуй.
Петра от уз и темницы изведый и невредна Церкви Твоей представивый, Христе, и рабов Твоих в заточении сущих (раба Твоего в заточении суща, рабу Твою, в заточении сущую, имярек), яко Милосерд помилуй и от уз свободи, молимся Тебе, Всемилостивый Спасе, услыши и помилуй.
Избавляяй нища от сильна, и убога емуже несть помощника, в беде и в заточении, и во узах сущих (суща, сущую), яко Щедр милостивно свободи, прилежно молимся Тебе, скоро услыши и яко Щедр помилуй.
Еще молимся Тебе, Господу Богу нашему, о еже прияти молитвы нас недостойных рабов Твоих в сию годину испытания, пришедшую на отечество наше, и о еже явити спасение Твое.
Возглас: Услы́ши ны, Бо́же, Спаси́телю наш, упова́ние всех конце́в земли́, и су́щих в мо́ри дале́че, и ми́лостив, ми́лостив бу́ди, Влады́ко, о гресе́х на́ших, и поми́луй ны: Ми́лостив бо и Человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
И по возглашении: Со умилением паки и паки (преклоньше колена), Господу помолимся.
Молитва
Господи Иисусе Христе Боже наш, святаго апостола Твоего Петра от уз и темницы без всякаго вреда свободивый, смиренно молим Тя: приими милостивно моление наше о оставлении грехов рабов Твоих (раба Твоего, рабы Твоея, имена) в темницу всажденных (всажденнаго, всажденную) и молитвами апостола Твоего и всех святых, яко Человеколюбец, всесильною Твоею десницею от всякаго злаго обстояния избави и на свободу скоро изведи, да благодарно славят (славит) Тя и Безначальнаго Твоего Отца и Святаго Духа во веки веков.
Аминь.
Прему́дрость.
Пресвята́я Богоро́дице, спаси́ нас.
Честне́йшую Херуви́м/ и сла́внейшую без сравне́ния Серафи́м,/ без истле́ния Бо́га Сло́ва ро́ждшую,// су́щую Богоро́дицу Тя велича́ем.
Сла́ва Тебе́, Христе́ Бо́же, Упова́ние на́ше, сла́ва Тебе́.
Сла́ва, и ны́не. Го́споди, поми́луй (трижды). Благослови́.
Отпуст: Христос, истинный Бог наш, молитвами Пречистыя Своея Матери, силою Честнаго и Животворящаго Креста; предстательством святых Ангелов Хранителей наших; святых славных первоверховных апостолов Петра и Павла, и прочих святых славных и всехвальных апостолов; святых славных добропобедных мучеников; святой великомученицы Анастасии Узорешительницы; святаго священномученика патриарха Ермогена; святых Царственных мучеников и всех новомучеников и исповедников Церкве православныя; святых праведных Богоотец Иоакима и Анны и всех святых, помилует и спасет нас, яко благ и человеколюбец.
Аминь.
Помоги Вам Господь!